精銳盡出斬瓜切菜
聽朝世盃南美區外圍賽首輪有阿根廷登場，喺主場迎戰厄瓜多爾。阿根廷球王美斯一直視世盃冠軍為終極目標，鬥心唔使懷疑，夥拍拿達路馬天尼斯及奧甘波斯，必定火力全開，不過佢哋條後防實在唔太穩陣，隨時與厄瓜多爾合演入球騷，中位數2.5球入球大必捧。（周五早上8時10分開賽）

美斯唔經唔覺已33歲，2年後嘅卡塔爾世盃決賽周，極有可能係佢「最後探戈」，為圓捧盃夢一定拚盡，當然，先決條件係打好外圍賽，爭取入場券喇。阿根廷主帥史卡朗尼早前講過，唔會學巴塞教頭朗奴高文用美斯裝「假9」，據報佢打算採用4312陣式，美斯會出任進攻中場，前面會起用拿達路馬天尼斯同奧甘波斯，為呢位隊長開路，相信會擦出火花。

但相對之下，阿根廷嘅中後場級數真係差一截，熱刺中場盧施素因傷退隊，可能要起用里安度柏利迪斯、迪保羅等工兵，點都爭啲，而防線更加恐怖，由曼城棄將奧達文迪擔大旗，見到個心都離一離，加上史帥愛用河床門將法蘭高艾馬尼，令轉投維拉表現神勇嘅達米安馬天尼斯無用武之地，隨時又變得有前冇後。

厄瓜多爾唔會玩死守
厄瓜多爾大部分球員都喺美洲搵食，只得卡路士古路素、諾保亞、安拿華倫西亞等仍外流歐洲，不過佢哋一向崇尚進攻，上屆世盃外9場作客8仗有失波，確係唔玩死守。加上雙方近4次正面交鋒，合共炮製16個士哥，有3仗開3球或以上，其中1仗美斯更大演帽子戲法，預計今仗都係大手交易。